الأربعاء، 28 نوفمبر، 2007

مبسوط ياعم أولمرت؟؟؟

الصورة بتتكلم......... السيد أولمرت و كانه يشكر ممتنا محمود عباس علي تعاونه و تفهمه لمواقفه ....... و السيد محمود عباس و كانه يقول له خجلا .... لا شكر علي واجب ..... أما السيد بوش فكأنه يقول مبسوط ياعم أولمرت .... طلباتك أوامر ... العملية بسيطة .... جيبنالك العرب .... ولم تلتزم بأي إلتزام ..... عيش حياتك زي ما إنت عايز و لا يهمك ..... طظ في الدنيا كلها ..... المهم تكون راضي و مبسوط
السيد أولمرت يرفض تحديد فترة زمنية للمفاوضات .... المهم المفاوضات تبقي ماشية .... و تبطلوا إرهاب اللي البعض بيسميه مقاومة ..... طب مقاومة ليه ..... ما المفاوضات ماشية .... إيه لازمة المقاومة
الخلاف بين الإسرائيليين و الأمريكان من ناحية و بين العرب و الفلسطينيين من الناحية التانية (و ربنا ما يجيب خلاف و لا يدخل الشيطان بينهم) إن الجماعة الأمريكان و الإسرائيليين عايزين الطبخة (أقصد المفاوضات) تاخد راحتها علشان كل الأمور تتناقش ... و مفيش داعي للإندفاع و الإستعجال لأن في العجلة الندامة ..... فيه أمور كثير لازم تحسم الأول مثلا ....... إيه يكون الوضع لو فيه رياح هبت و شالت شوية رمل من منطقة تخضع للإسرائيليين و حطتها في منطقة تخضع للفلسطينيين ..... الموضوع ده مهم و لازم يتناقش ..... و كله بالمفاوضات ..... طب يكون إيه الحال لو نزل شوية مطر علي المناطق الفلسطينية و ثبت إن مياه المطر ديه كانت متبخرة من مناطق إسرائيلية ...... برضك موضوع مهم و عايز يتناقش ..... و كله برضه بالمفاوضات ..... طب بلاش ... يكون إيه الوضع لو ناموسة قرصت واحد إسرائيلي و مصت دمه و هربت للمناطق الفلسطينية .... هل يحق لجيش الدفاع مطاردتها و لا الفلسطينيين هما اللي هايطاردوها .... و لا نجيب طرف ثالث يطاردها .... برضك موضوع مهم و عايز يتناقش ..... و كله بالمفاوضات ..... طب سيبك من ده كله إيه يكون الحال لو عرسة أو فار خطف كتكوت أو فرخة من واحد مستوطن و هرب بيها للمناطق الفلسطينية ...... و إيه ...... و إيه ....... و إيه
يا جماعة مواضيع كتير لازم تتناقش و يتحط لها بنود ..... العملية مش لعب عيال.......... و علي المفاوضات ما تخلص ( و إبقي قابلني لو خلصت) معلش بقي تبطلوا إرهاب ..... اللي بعض المخربين بيسمية مقاومة ..... و أحنا هانستمر في الإستيطان و تهويد القدس ....... لأن المواضيع دي نناقشها في الآخر ...... و طبعا تيجي أمريكا في الآخر و تقول
لا بد من مراعاه المتغيرات علي أرض الواقع
ناس ناصحة
و ناس هبلة
المهم السيد عباس
مش هايفاوض حماس
و مش هايكلمها
و هايفضل مخاصمها
لحد ما تنسحب من غزة
و عجبي .....و عجبي

ليست هناك تعليقات: