الثلاثاء، ٤ ديسمبر ٢٠٠٧

حصاد أنابوليس

الصورة اللي فوق دي وجدتها علي موقع مصراوي (علشان حقوق الملكية الفكرية يعني) و أعطيت نفسي الحق في نقلها هنا زي ما هي ....... و الحقيقة الصورة معبرة جدا عن وضعنا الحالي فأمريكا تمد إسرائيل بكل شئ .... و إسرائيل بدورها تقتل و تشرد العرب ...... و مع أن العرب يكرهون إسرائيل ..... فالغريب أن العرب يحبون أمريكا
و بالنسبة للجزء الأخير و هو أن العرب يحبون أمريكا مع كرههم لإسرائيل فلست أدري هل هو حب حقيقي أم خوف حقيقي ؟؟؟ .... و صحيح من خاف سلم .... ثم هل كره إسرائيل حقيقي أم هو شعور ظاهره الكره و باطنه الحب ؟؟؟
تعالوا نروح لأنابوليس
الدنيا كلها إتكلمت عن أنابوليس و كأن أنابوليس هي مفتاح الكنز و كلمة السر المستخبية اللي ماحدش كان عارفها لحد ما الرب أهدي هذا السر لنبي السلام و رسول المحبة للعالم جورج بن دبليو آل بوش و لمساعدته المجتهدة القديسة كوندا بنت ليزا آل رايس .... و بالتالي لازم الكل يبارك و يؤمن و يؤيد

قالوا هيعملوا إتفاق مبادئ ........ و لم يحدث
قالوا سيفرج عن أسري .........و لم يحدث
قالوا سيتوقف الإستيطان ........و لم يحدث
قالوا ستتوقف عمليات تهويد القدس ...... و لم يحدث
قالوا هيبقي فيه جدول زمني ........ و لم يحدث
و بعدين قالوا ده مؤتمر لدعم إقامة دولة فلسطينية
و النتيجة .......... و آه من النتيجة
لموا أربعين دولة .... منهم 16 دولة عربية
و قالوا كله خاضع للمفاوضات
كله ..... كله ..... بالمفاوضات
الأسري بالمفاوضات ..... و الإستيطان بالمفاوضات .... و الإنسحاب بالمفاوضات .... أي حاجة بالمفاوضات

و لا تسأل عن الشرعية الدولية ..... و لا عن دولاب الأمم المتحدة المليان قرارات بحقوق العرب و الفلسطينيين

بس فيه حاجات مهمة مش بالمفاوضات
إسرائيل دولة لليهود بس
أوعوا حد يقول دي عنصرية ... أو تعصب ديني ..... أو عودة للدولة الدينية ..... الكلام ده إحنا اللي نقوله بس
هكذا قال السيد جورج بن دبليو آل بوش أمام الجميع و هذا الموضوع مش بالمفاوضات
و لازم عباس و العرب يحاربوا الإرهاب الفلسطيني

و قبل المؤتمر و طوال المؤتمر و بعد المؤتمر إسرائيل و بشكل يومي تقتل الفلسطينيين و ليس المطلوب من العرب و عباس السكوت بس ..... لأه .... المطلوب دعم إسرائيل و التعاون معها في مواجهة الإرهاب .... و محدش يتكلم عن الإرهاب الإسرائيلي و قتل النساء و الأطفال .... ده دفاع عن النفس
و السيده رايس لسة بتتكلم عن الدولة الوهمية الفلسطينية اللي محدش عارف عنها حاجة و مفيش جدول زمني و لا مواعيد ملزمة بنهاية التفاوض
و علشان العملية تتحبك و الشعوب العربية لا تثور ( الناس دي بتاخد بالها من كل حاجة) و علشان التمثيلية تكمل تطلع السيدة ليفني تشكو من إن محدش من العرب كان معبرها في الإجتماعات ( اللي محدش شافها و لا شاف كانوا قاعدين إزاي ) و إنها كانت منبوذة (قال يعني عايزيننا نصدق) و أكدت سيادتها إنها مش جربانة
و السؤال الآن بعد أنابوليس
الفلسطينيين خدوا إيه و الإسرائيليين خدوا إيه؟؟؟؟
و السؤال الأهم العرب راحوا أنابوليس ليه؟؟؟

الأربعاء، ٢٨ نوفمبر ٢٠٠٧

مبسوط ياعم أولمرت؟؟؟

الصورة بتتكلم......... السيد أولمرت و كانه يشكر ممتنا محمود عباس علي تعاونه و تفهمه لمواقفه ....... و السيد محمود عباس و كانه يقول له خجلا .... لا شكر علي واجب ..... أما السيد بوش فكأنه يقول مبسوط ياعم أولمرت .... طلباتك أوامر ... العملية بسيطة .... جيبنالك العرب .... ولم تلتزم بأي إلتزام ..... عيش حياتك زي ما إنت عايز و لا يهمك ..... طظ في الدنيا كلها ..... المهم تكون راضي و مبسوط
السيد أولمرت يرفض تحديد فترة زمنية للمفاوضات .... المهم المفاوضات تبقي ماشية .... و تبطلوا إرهاب اللي البعض بيسميه مقاومة ..... طب مقاومة ليه ..... ما المفاوضات ماشية .... إيه لازمة المقاومة
الخلاف بين الإسرائيليين و الأمريكان من ناحية و بين العرب و الفلسطينيين من الناحية التانية (و ربنا ما يجيب خلاف و لا يدخل الشيطان بينهم) إن الجماعة الأمريكان و الإسرائيليين عايزين الطبخة (أقصد المفاوضات) تاخد راحتها علشان كل الأمور تتناقش ... و مفيش داعي للإندفاع و الإستعجال لأن في العجلة الندامة ..... فيه أمور كثير لازم تحسم الأول مثلا ....... إيه يكون الوضع لو فيه رياح هبت و شالت شوية رمل من منطقة تخضع للإسرائيليين و حطتها في منطقة تخضع للفلسطينيين ..... الموضوع ده مهم و لازم يتناقش ..... و كله بالمفاوضات ..... طب يكون إيه الحال لو نزل شوية مطر علي المناطق الفلسطينية و ثبت إن مياه المطر ديه كانت متبخرة من مناطق إسرائيلية ...... برضك موضوع مهم و عايز يتناقش ..... و كله برضه بالمفاوضات ..... طب بلاش ... يكون إيه الوضع لو ناموسة قرصت واحد إسرائيلي و مصت دمه و هربت للمناطق الفلسطينية .... هل يحق لجيش الدفاع مطاردتها و لا الفلسطينيين هما اللي هايطاردوها .... و لا نجيب طرف ثالث يطاردها .... برضك موضوع مهم و عايز يتناقش ..... و كله بالمفاوضات ..... طب سيبك من ده كله إيه يكون الحال لو عرسة أو فار خطف كتكوت أو فرخة من واحد مستوطن و هرب بيها للمناطق الفلسطينية ...... و إيه ...... و إيه ....... و إيه
يا جماعة مواضيع كتير لازم تتناقش و يتحط لها بنود ..... العملية مش لعب عيال.......... و علي المفاوضات ما تخلص ( و إبقي قابلني لو خلصت) معلش بقي تبطلوا إرهاب ..... اللي بعض المخربين بيسمية مقاومة ..... و أحنا هانستمر في الإستيطان و تهويد القدس ....... لأن المواضيع دي نناقشها في الآخر ...... و طبعا تيجي أمريكا في الآخر و تقول
لا بد من مراعاه المتغيرات علي أرض الواقع
ناس ناصحة
و ناس هبلة
المهم السيد عباس
مش هايفاوض حماس
و مش هايكلمها
و هايفضل مخاصمها
لحد ما تنسحب من غزة
و عجبي .....و عجبي

الاثنين، ٢٦ نوفمبر ٢٠٠٧

السباق إلي أنابوليس

حقيقة ....إن العرب لا يتعلمون
فمنذ سمعنا عن مؤتمر أنابوليس .... سمعنا الكثير عن أن العرب لن يسمحوا أن يكون مثل المؤتمرات السابقة... مجرد للقاءات و تبادل التحيات و البسمات و القبلات..... و لكنة لابد أن يكون مؤتمر جاد .... و سمعنا الكثير عن أن إسرائيل سوف تتعهد بأشياء ... و سيتم الإفراج عن أسري ... و سيتوقف الإستيطان .... و سيتم تناول مشاكل الحل النهائي بجدية وشجاعة ..... و أنه لابد من دعم عباس و المعتدلين الفلسطينيين و العرب في مواجهة المتطرفين الوحشين و الكثير من هذا الكلام..... و الآن وقد حان وقت المؤتمر ...... ماذا تم؟؟؟؟؟؟؟؟؟
أولا: الكنيست الإسرائيلي خد قرار بعدم السماح بأي إنسحاب من القدس (و لم نسمع أي إعتراض أو إستنكار من أمريكا علي أن هذا يعتبر إستباق لنتائج المفوضات أو شرط مسبق لها , إنما الصمت التام) و طبعا الوضع كان سيختلف لو أن مثل هذا الكلام صدر عن العرب
ثانيا :إسرائيل هي اللي ليها مطالب و تطالب العرب بالإعتراف بيهودية الدولة -- يعني كدة فتح كلام لازم تعملوا اللي إحنا عايزينه
ثالثا : وزيرة الخارجية الإسرائيلية تطالب بإلحاق عرب 48 بالدولة الفلسطينية القادمة (يعني اللي فضلوا ما هاجروش تاخدوهم .... و بالتالي محدش يتكلم عن عودة اللاجئين) أحلي تطبيق للشرعية الدولية و القرارات الأممية
رابعا : السيدة كوناليزا رايس تقول أن الضغط علي إسرائيل خط أحمر ( يعني المقاومة إرهاب ... و الضغط خط أحمر .... و المقاطعة عيب و مايصحش ...... إستنوا اللي إسرائيل نفسها تجود بيه) و لا عزاء للشرعية الدوليه و المبادرة العربية و اللجنة الرباعية
و جه المؤتمر و وجهت أمريكا الدعوات (أو قل الإستدعاءات) و الإستيطان مستمر و لم يفرج عن أسري و لم تحدد وثيقة للتفاهم عليها بل و الأمر من هذا أن أمريكا ترفض تحديد سقف زمني للتفاوض
بقي لكم عشرات السنين في مشاكل ..... إتفاوضوا قد كدة 100 و لا 150 سنه المهم العرب عن بكرة أبيهم لأول مرة يتفقوا بالإجماع علي الحضور رغم ما فيه من تطبيع مجاني تريده إسرائيل و أمريكا
البعض يقول أن العرب يريدون أن يثبتوا للعالم رغبتهم في السلام
و الخبثاء يقولون أن العرب يحبون النساء و الست كونداليزا توزع القبلات عليهم و مش عايزين يزعلوها ثم إن إسرائيل أرسلت للمؤتمر المزة وزيرة خارجيتها التي أعلنت أن من يصل للمؤتمر أولا هايقعد جنبها

السبت، ٢١ يوليو ٢٠٠٧

إمال البرغوثي ... و سعدات ... فين من الليلة دي


طبعا ألف مبروك لكل أسير تم تحريره فلقد تحملوا الكثير من أجل قضيتهم و وطنهم و دينهم و شعبهم ... و الله يجزيهم خيرا و يجعل أيام عذابهم في ميزان حسناتهم .... اللهم آآآآآآآآمين
لكن الملفت للنظر إن من أفرج عنهم كانوا علي وشك إنهاء محكوميتهم الظالمة التي حكمت بها محاكم الظلم عليهم يعني كانوا كده كده طالعين فإسرائيل جابتها بجميلة مع عمنا عباس
و أنا لا أريد أن أفسد الفرحة و لكن لدي كما لدي الكثيرين بعض الأسئلة ربما الإجابة عن بعضها يورينا الأمور ماشية إزاي و رايحة علي فين خاصة بعد ما تكشفت أمور بعد سقوط مقرات المخابرات و مستنداتها بيد حماس
كان فيه كلام كثير إتقال أيام مفاوضات الجندي شليط
الكلام كان عن الإفراج عن مروان الرغوثي
و كلام من إسرائيل إنها معندهاش مانع
كلام من مسئولين يهود كبار
مستوي وزراء يعني
لماذا لم يفرج عن البرغوثي؟؟
اليهود قالوا إن الإفراج عن البرغوثي
لدعم محمود عباس
هل عباس مش عايز الدعم ده ؟؟
هل لترشيح البرغوثي نفسة رئيسا للسلطة
خلفا للمرحوم ياسر عرفات علاقة بعدم الإفراج عنه؟
و هل معني هذا أن البرغوثي لن يفرج عنه
طالما عباس و رجاله موجودين في السلطة؟
ثم من الذي سلم البرغوثي لليهود أصلا؟
من الذي سلم اليهود أحمد سعادات؟
و هو كان تحت حماية أمريكية بريطانية دولية مهلبية
و لماذا لم يشمل الإفراج أحمد سعدات؟
ألم يكن الإفراج عن سعدات يدعم عباس؟
*********
و طبعا كلنا ... عرب ... مسلمين.... مسيحيين
وطنيين .... نعاني نفس الألم
عندنا سؤال مهم
مين سلم اليهود
عرفات ...
و أحمد ياسين ...
و عبد العزيز الرنتيسي
و غيرهم؟؟
اللي يعرف الإجابة يتصل بزيرو تسعماية
ممكن يكسب حاجات كثير...
و ممكن يخسر عمره....
بس أكيد هايكسب رضا ربه

الجمعة، ٢٠ يوليو ٢٠٠٧

الراجل ده متجدد دائما

"ان مقاتلي الكتائب وقعوا على تعهد بوقف الهجمات ضد اسرائيل
" التزاما باوامر الرئيس الفلسطيني محمود عباس ودعما له
واوضح الزبيدي في حديث لوكالة فرانس برس
ان ذلك يهدف الى اتاحة الفرصة لوزير الداخلية لضبط الامن وانهاء حالة الفوضى والفلتان الامني في الشارع الفلسطيني"
و لمتابعة الخبر بالتفصيل نرجو متابعة هذا الرابط
http://www.masrawy.com/News/2007/MidEast/AFP/July/15/262631.aspx

يانهار إسود و منيل
... وقف الهجمات علي إسرائيل
....بأوامر من محمود عباس
.... لدعم عباس و حكومته
...و لمساعدة وزير الداخلية لإنهاء الفلتان الأمني

سؤال من واحد ذكاؤه محدود و فهمه علي أده
إيه علاقة الهجمات علي إسرائيل بالفلتان الأمني ؟؟؟؟
عموما شوية .... شوية ... الصفقة بتبان و تتضح معالمها

شوفوا الخبر ده كمان
افاد مسؤول امني فلسطيني كبير الأحد 15-7-2007 ان حوالى 189 ناشطا فلسطينيا تلاحقهم اسرائيل بينهم مسؤولون, وافقوا على وقف انشطتهم العسكرية المناهضة لاسرائيل في الضفة الغربية مقابل وقف ملاحقتهم.وقال هذا المسؤول الكبير ان "كل الاشخاص ال189 الذين وردت اسماؤهم على لائحة قدمتها اسرائيل" وافقوا على وقف انشطتهم مؤكدا ان زكريا الزبيدي المسؤول العسكري لفتح الذي يتصدر لائحة الاشخاص المطلوبين لدى اسرائيل في الضفة الغربية وافق على هذا الاتفاق.وينتمي القسم الاكبر من هؤلاء الناشطين الى كتائب شهداء الاقصى, الذراع العسكرية لحركة فتح التي يتزعمها الرئيس الفلسطيني محمود عباس. اما الباقون فينتمون الى فصائل منظمة التحرير الفلسطينية مثل الجبهتين الديمقراطية والشعبية لتحرير فلسطين.وليس في هذه القائمة اي عضو من حركة حماس التي تعتبرها اسرائيل كما الولايات المتحدة والاتحاد الاوروبي "منظمة ارهابية".


http://www.alarabiya.net/articles/2007/07/15/36600.html
واخين بالكو معايا العمليه بتبان أهه ... شوفتوا المقابل ... مش الإنسحاب ... مش حماية الأقصي و تحريره ... يا شهداء الأقصي ... المقابل هو وقف الملاحقة (يعني لما كنتوا قررتوا تقاوموا ..... حد كان قال لكم .... مش هايكون فيه ملاحفة).... بصراحة الناس تعبوا من الجري ... و اليهود بيجروا وراهم ... قالوا خلاص ... إحنا مش هانقرب لكم ... و إنتوا ماتجروش ورانا .... طب لما إنتوا مش قد الجري ... كان إيه لازمته من الأول ... يا شهداء الأقصي
و طبعا اليهود بكرمهم المعتاد ردوا علي المبادرة بالمثل
الأول شوفوا الخبر ده


http://www.aljazeera.net/NR/exeres/F85D15BA-CAB4-4732-92AD-8ADC6DA4F3A4.htm



عملية مغازلة بسيطة بين الطرفين... و جمايل متبادلة .... مش قلت لكم البوسة كانت جادة ... و ليها توابع
مبروك يا جماعة .... هاتشيلوا الأقنعة و البراقع ... زي ما سقطت أقنعة و براقع كثير
و طبعا إسرائيل ها تجامل كمان و كمان ... طول مانت بتتنازل كمان و كمان... شوفوا الخبر ده
http://www.alarabiya.net/articles/2007/07/20/36845.html



كل ده علشان خاطر عيون أبومازن

بس ما تطمعشي قوي
الكرم برضه له حدود



و ما تزعلشي لو مسكنا كام واحد تاني

نضايفهم عندنا شوية

أهو برضة هاينفعوا

نجاملك بيهم مرة تانية

أفاد مراسل الجزيرة في فلسطين بأن قوات الاحتلال الإسرائيلي اعتقلت الليلة الماضية14 فلسطينيا في أنحاء مختلفة من الضفة الغربية، وقد شملت هذه الاعتقالات نشطاء من فصائل مختلفة

http://www.aljazeera.net/NR/exeres/E78695A0-2662-4FBE-ACC6-E9549CCDAB97.htm


طبعا أنا عارف فيه ناس كثيره قرفانة
و يمكن يصيبها اليأس و الإحباط
أنا لألألأ
ربنا له حكمة كبيرة
ليميز الخبيث من الطيب
و يظهر الغث و الثمين
و يفرق الأهبل و اللي بيستهبل
و العبيط و اللي بيستعبط
و الوطني المخلص و العميل الخائن
اللهم إقدر لنا الخير حيث كان
ثم إرضنا به
و إكفنا شر الفتن
ما ظهر منها و ما بطن
آآآآآآآآآآآمين

الخميس، ١٩ يوليو ٢٠٠٧

طب إيه رأيكم بقي .... مفيش مقاومة


طبعا كلنا فاكرين الصورة دي

ياعم بتعمل إيه الله يقرفك

ده أنت محتاج تستحمي سبعتلاف مرة

كلها بالتراب و برضه مش هاتنضف

السيد الرئيس / محمود عباس صدق إنه رئيس و رئيس كبير كمان .... قاعد علي المكتب ... ماسك القلم ... و هاتك ياتوقيع .... آل إيه مراسيم رئاسية ... و طبعا أمريكا و إسرائيل مبسوطين و بسقفوا

مرسوم بإعلان حالة الطوارئ (حاله الطوارئ لم تعلن لما الإسرائيليين عملوا أي حاجة ... توغلات ... إعتقالات... إغتيلات ... خطف ... كل ده عادي عند السيد الرئيس ما يحتاجشي طوارئ ) و لكن إنكشاف الذيول الخائنة ... التي تلعنها دماء الشهداء و المظلومين محتاج طوارئ

مرسوم بإقالة الحكومة المنتخبة (لإنها مش شرعيه ... لأن للي ما يعرفش دي منتخبه سادة ... إنما شرعية سيادته محشية فلوس) و بالتالي الشرعية المحشية تلغي الشرعية السادة

مرسوم بحكومة طوارئ (ليس فيها عضو واحد من الأغلبية لأن شرعيتهم سادة) و طبعا كل الحكومة من رجالته

أمريكا أم الديمقراطية المقلية و المحشية في العالم أيدته و قالت هي دي الشرعية بالتقليه

الحصار قالوا هايترفع عن الضفة بس لكن غزة لسه شرعيتها سادة تفضل محاصرة

إسرائيل تفرج عن الفلوس بتاعو الفلسطينيين للضفة فقط و غزة لآلآلآ

مرسوم بتجريم سلاح المقاومة و اللي هايخالف هايشوف هانعمل فيه إيه و لازم كل المقاومين يسلموا سلاحهم خلاص الحرب خلصت مافيش حاجة إسمها مقاومة بعد الآن و من فضلكوا تابعوا الرابط ده

http://www.aljazeera.net/NR/exeres/6BD14EC7-8A04-4CA9-95B9-B281ED1AF0B9.htm

طب ليه ياراجل هوة إنت خدت حاجة لسه ده كل المشاكل لم تحل ...هل تم هدم الجدار؟؟؟ ... هل عادت القدس؟؟؟ ...هل عاد اللاجئون؟؟؟... إيه اللي بيحصل عايز أفهم

قالك ... محمود عباس يتزعم مقاومة جديدة ... نوعية .... هايسيب اليهود و الأمريكان لضميرهم و خلاص هانرمي السلاح مالوش لازمه في هذه المرحلة التاريخية التي سيحارب بها الإسرائيليين بعذاب الضمير

مش باقولكم .... البوسة كانت جامدة ... و ليها كمان توابع

الراجل ده بانت لبته

طبعا أنا كنت ناوي أكمل علي موضوع الراجل ده هايجن أهلي فيما بعد الإنتخابات لكن تسارع الأحداث جعلني مضطر أأجل شوية الكمالة وقتها لسه موجود المهم دلوقتي المستجدات المتسارعة اللي بتحصل كل شوية تقريبا


و طبعا علشان نكون موضوعيين فيه شوية حاجات لازم تتحط في الميزان علشان ناخد منها النتيجة


أولا : حديث السيد / هاني الحسن (كبير مستشاري محمود عباس ) لقناة الجزيرة عن أحداث غزة و التي كان فيها موضوعي إلي حد كبير فبالرغم من دفاعة عن حركة فتح التي هو من قياداتها إلا أنه أدان تيار فيها قال إنه يخدم خطة الجنرال دايتون الأمريكي و قال إن المطلوب كان رأس حماس و إن حماس قامت بإستباق الأحداث التي لو تركت كما كان مخططا لها لإنقلبت المائدة عليها و يمكنكم متابعة الموضوع بالكامل علي الرابط ده


ثانيا :السيد الرئيس/ محمود عباس لأنه راجل ديمقراطي ولديمقراطيته هذه ترضي عنه أمريكا و إسرائيل قرر أن يكافئ رفيق الدرب السيد / هاني الحسن فأقاله من منصبه إحتراما للرأي و الرأي الآخر و يمكن متابعة ذلك علي الرابط ده




ثالثا : الوزير الفتحاوي السابق السيد / ناهض الريس قال في حديث له إن حماس إستبقت ضربة كانت ستوجه لها و أنه هو شخصيا عاني الكثير من أمن الرئاسة و القوي الأمنية التابعة لدحلان و رفاقه و يمكن متابع الحديث علي هذا الرابط

رابعا: السيد / فاروق قدومي أمين سر حركة فتح و رئيس الدائرة السياسية في منظمة التحرير الفلسطينية قال إن محمود عباس تحركه أيدي الفاسدين و يمكن متابعة ذلك علي الرابط التالي

خامسا:عندما إتخذت جامعة الدول العربية قرارا بإرسال لجنة تقصي حقائق لغزة للتحقيق فيما حدث و تحديد المسئول
رحبت حماس بالجنة لكن رجال فتح رفضوا إستقبال اللجنة و إعتبروا اللجنة تدخلا ممجوج و غير مقبول من الدول العربية في الشأن الفلسطيني يعني مش عايزين حد ينحشر و مع ذلك عباس و رجاله مستمرين في حشد أمريكا و إسرائيل علي حماس يعني التدخل المقبول لأمريكا و إسرائيل بس

سادسا: فيه مثل شعبي مصري يحذر من التعامل مع العاهرة حتي و لو بالنصيحة لأنها كاشفة وشها و مبجحة و المثل بيقول

" تيجي تكلمها ... تلهيك ... و تجيب اللي فيها ... فيك "

و ده اللي بيتعمل النهارده ... أمريكا أعلنت بعد دخول قوات حماس مقرات المخابرات الفلسطينية أن حماس حصلت علي كنز مخابراتي و طبعا عباس و الي معاه عارفين البلاوي الوسخة اللي حماس حصلت علي مستندات و أدله عليها و لذلك رفضوا تدخل الدول العربية و إنما أمريكا و إسرائيل دول مننا و علينا ..... و علشان يلهي حماس طلع إسطوانة قال أمام أعضاء المجلس الوطني الفلسطيني إن فيها دليل علي تدبير محاولة إغتيال له شخصيا و لما الراجل سخن حب يقدم خدمة لأسياده في تل أبيب و أمريكا فقال إن سوريا و إيران و قطر علي علم بهذه المحاولة و لما سوريا و إيران وقطر كذبوه قال أنا مقلتش فكذبه أعضاء المجلس الوطني الفلسطيني و قالوا إنه ٌال أسماء الدول دي بالإسم و بقي شكله وحششششششششش لكن اللي زيه ولا يهمه شكلة المهم رضا الكبار و يمكن متابعة الموضوع علي الرابط ده

سابعا :الراجل ده عمل زي اللي حط لأخوه حشيش في شنطته و بعدين بلغ عنه البوليس .... علشان يضمن إن مصر تحارب معاه حماس و يهيج أمريكا و إسرائيل علي حماس زيادة قال إن حماس تؤي القاعدة فطبعا مصر لما لقته زودها قوي قامت مكدباه ... و يمكن متابعة التكذيب علي الرابط ده

ثامنا:تفتكروا الراجل ده بيشتغل لحساب مين .... هل لحساب شعبه ؟؟؟ ....لآ أظن

و إلي لقاء نكمل ...إنشاء الله و كان في العمر بقية

السبت، ١٤ يوليو ٢٠٠٧

الراجل ده هايجن أهلي




طبعا كلنا فاكرين الراجل ده


الله يرحمة


سواء مات ميته طبيعية أو إتقتل بالسم و التآمر فنحن مؤمنين بالله و أنه "تعددت الأسباب و الموت واحد " لكن عايز أقول الراجل ده تم القياس له بمليون مسطرة كاوتش فمن أيام أيلول الأسود لأيام لبنان لتونس كان زعيم إرهابي لمنظمة إرهابية و بعد أوسلو بقدرة قادر بقي شريك سلام


قبل أوسلو قالو: لأه ما نقعدشي مع راجل إرهابي إيديه ملطخة بدماء الأبرياء (طبعا يقصدوا اليهود لأن العرب مفيش فيهم أبرياء و بعدين العرب ما عندهومش دم يلطخ الإيدين فلو إتقتل مليون عربي أو مسلم ما بيخروش دم علشان ما عندهومش و بالتالي محدش إيديه بتتلطخ بدمائهم لكن إسم الله اليهود دمهم كتير و زي الصبغة المنيلة ما بتتشالشي من الإيدين فكانوا بيبصوا في إيدين عرفات يلاقوا اللون ملطخ إيديه يقولوله لأ مش هانقعد معاك مع إنه كان بيغسلها كويس) المهم الراجل الإخوة العرب أقنعوة يقدم بعض التنازلات فالراجل وافق بشرط بعيد عن الثوابت (حلوة الثوابت دي) فتحول بين عشية و ضحاها إلي رسول سلام و إيديه نضفت (مسطرة كاوتش زي ما قلت لكم) و بدأت الحكاية مع رابين و بيريز و باراك و نتنياهو شارون و كل ما ييجي واحد منهم بعد الثاني يقوله كنتوا بتقولوا إيه تعالي نتكلم و نتفق من الأول إنت اتنازلت لفلان عن كذا هاتتنازل لي عن إيه علشان نكمل يقوله مانا إتنازلت يقوله لأه خليك حلو اللي فات مات إتنازل لي أنا شوية و لما يسألهم طب اللي قبلكم إتفق معايا علي كذا يقولواله مالناش دعوة بيه إحنا بنتكلم من الأول و طبعا كل ده برعاية أمريكية و صمت و تشجيع عربي علي المزيد من التنازلات زي ما قلت لكم مسطرة كاوتش مطاطة


المهم الراجل جاب آخرة و لقي إن أي تنازل جديد سوف يكون خيانة لشعبة فغلط الغلطة الكبيرة ..... قال لأة ... قوم إيه إفتكروا أنه كان إرهابي و إيدية لسه ملطخة بدماء الأبرياء و ما ينفعشي شريك للسلام



قالوا بس ده أصبح رئيس سلطة منتخب و له حصانه قالوا السلطة من السلاطة و الحصانه من الحصان نحبسة لحد مايموت و تم حبسه في غرفتين و لحسوا كل الإتفاقات معاه و قالوا ما ينفعش شريك للسلام




طبعا مش هوة الراجل ده اللي هايجن أهلي



المهم تدخل الأصدقاء و ما أكثرهم و أقنعوة يتنازل عن بعض سلطاته لرئيس وزراء طب نجيب مين .... نجيب مين .... واحد صاحبك ... فكر .... تستعين بصديق .... و لا تاخد خيارات .... نقرب لك الحكاية شوية رشح مهندس أوسلو ... و جنرال التنازلات ..... قوم إيه إضطر المسكين يعين رئيس وزراء هوة


الراجل ده



و هوة ده اللي هايجن أهلي


و هايجننا كلنا


و طبعا جاب معاه معاونين كتير بتوعة علشان ينفضوا للراجل اللي فوق الله يرحمة و كان من أهم المعاونين دول


الراجل ده


اللي لواحده حكايته حكايه مهببة و منيلة بستين نيلة علي دماغ البعدا

المهم عمنا أبو مازن اللي جننا خلاص شكل الوزارة و قرر ينفض للزعيم و يبقي هوة الزعيم و هاتك يا مفاوضات الوضع الإبتدائي و الوضع النهائي و الوضع المتوسط و الوضع المعووج المهم عايزين تنازلات و تعالي نتكلم من الأول الراجل قالهم أنا مجرد رئيس وزراء و مقدرشي سلطتي ليها حدود لكن العالم إياها بخلاء قوي رفضوا يدوله أي حاجة ... و بقي شكله وححححححححش راح مستقيل و خدها من قصيرة

قالواله طب خلاص نموت الزعيم و تبقي إنت الزعيم

و مات الزعيم

إزاي

الله أعلم

و الأعمار بيد الله

و الراجل اللي هايجننا بقي الزعيم

مالكشي حجة

بقيت الزعيم

شوية تنازلات بقي يازعيم

طب شوية أظبط المسائل علشان ما يتقالشي من أولها

براحتك

طب إدوني حاجة أوريها للناس تبرر التنازلات

بعينك

طب نفذوا أي حاجة علشان أعرف أتنازل

لما تشوف حلمة ودنك إتنازل الأول

و مباركة من هنا و تأييد من هنا و يالالا المشاكل كلها هاتتحل .... الراجل ده متفاهم .... الراجل ده كويس .... الراجل ده بتاع سلام لم لم لم لم

و آدي بوسة ياعم


و طبعا الصورة دي من عند إبن يسري ملطوشة منه (إيه ملطوشة دي إسمها إقتباس كل الناس بتقتبس من بعض) و عديها إقتباس المهم مش موضوعنا نعتذر لإبن يسري أصل إحنا جداد في الكار و لسة معندناش حاجة تقتبس بس ليه عندنا قبسة يقتبسها بعدين لما يحب .... إنما اللي عاجبني في صورة البوسة العاطفة الدولية المهلبية بين الإثنين ..... إيه الجمال ده
عصفورين صغننين بيبوسوا بعض
ربنا يهنيهم
شوفتوا الحب
السلام
الشوق و اللهفة
العولمة
الوئام
الترالاملام
أهم ميزات الراجل ده
نفسة حلوة قوي
و مش بيقرف
ياراجل إختشي علي دمك
و هكذا 18 شهر..... و المسكين مقضيها بوس و أحضان ..... و كان يطلع يدين عمليات المقاومة و يقول عليها عمليات وسخة و ما تخدمشي القضية و برضه
مفيش فايده مخدشي حاجة و بعدين كلف زحلان آسف دحلان يعمل أجهزة أمنية مش لمقاومة الإحتلال لا سمح الله لكن لمراقبة رجال المقاومة و إحباط عملياتهم و تبليغ إسرائيل عنهم لدفع مسيرة السلام

قالوله مش كفاية

إنزع سلاح المقاومة

قالهم ماقدرشي

ما يقدر علي القدرة إلا الله

طب إدوني حاجة أبرر بيها للناس

بعينك

طب وعد

لما تشوف حلمة ودنك

و بصراحة الراجل حاول علي قد ما يقدرإنه يشوف حلمة ودنة لكن ما باليد حيلة و جت الإنتخابات التشريعية
تان تان .... ترررلممممم (موسيقي مؤثرة) و كانت الصدمة للجميع

طبعا مصيبة لما الإنسان يكدب و يحاول يقنع الناس بالكدب ده ..... لكن المصيبة و الخيبة إن الشخص الكداب يصدق كدبه .... و دي غلطة صاحبنا .... صدق إن الناس مصدقاه و مقتنعة بيه ... و لذلك دخل الإنتخابات زي ما بيقولوا ...... واثق الخطوة يمشي ملكا ..... مش هامه حاجة .... و طبعا الإنتخابات تمت تحت إشراف دولي محايد .... و بنزاهة و شفافية شهد بها الجميع
لكن النتيجة كانت إيه ..... السقوط المروع لحركة فتح .... إللي بيتزعمها صحبنا .... و نجاح منافسها القوي .... حماس .... وناس كتير قالت إن صدمة النجاح علي حماس كانت أكبر من صدمة الهزيمة علي فتح
و أنا رأيي الشخصي إن اللي زود نسبة نجاح حماس ليس إنصارها فقط ولكن الناس اللي كانت قرفانة من الحال اللي وصلت له فتح من الإسترخاء و الفساد و الترهل الذي أصاب هياكلها ..... و كان ممكن صاحبنا و شلته يعوا الدرس و يصلحوا من أنفسهم لكن هيهات و البقية تأتي ..... , و إلي لقاء